حسن اور اس کا فسوں آسودہ خاک
عشق اور اس کا جنوں آسودہ خاک
لذتِ شوقِ فزوں آسودہ خاک
دل کا وہ رقصِ جنوں آسودہ خاک
شاعری چارہ گری اور عاشقی
سب صفاتِ گونا گوں آسودہ خاک
آرزوئیں حسرتیں خواب و خیال
رنج و غم سوزِ دروں آسودہ خاک
خاک میں ہے مل گیا نخچیر زن
اور ہوا صیدِ زبوں آسودہ خاک
فلسفہ منطق سیاست نفسیات
کب کہاں کس طرح کیوں آسودہ خاک
روح علییین کی مہماں بنے
جثہِ خاک اور خوں آسودہ خاک
یا الٰہی قبر ہو جنت کا باغ
رحمتِ حق میں رہوں آسودہ خاک
اپنے مرقد کی لحد میں لیٹ کر
پھر سے جی اٹھنے کو ہوں آسودہ خاک
مغفرت کی آس میں یہ ناتواں
بندگی میں سر نگوں آسودہ خاک
لکھ دیا جائے محمد مصطفیٰ
کے غلاموں میں سے ہوں آسودہ خاک
مظہری جی راہیِ ملکِ عدم
شاکیِ دنیائے دوں آسودہ خاک
سو رہے ہیں یاں جنابِ مظہریؔ
مشتِ خاکِ بے سکوں آسودہ خاک