عشقِ ممنوعہ
میں مظہرؔ ہوں مرے اپنے ستارے ہیں قمر بھی ہے
مگر یہ بھی تو دیکھو نا کہ دل بھی ہے نظر بھی ہے
ہے میرا اپنا محور تو تمھارا ہے مدار اپنا
کہ گردش پر مقدر کی نہیں کچھ اختیار اپنا
نہ تم نے حوصلہ بخشا نہ میں نے ہی جسارت کی
نہ کچھ بولے کنایوں میں نہ نظروں سے شرارت کی
نہ میں نے پیش قدمی کی، نہ تم نے کی پذیرائی
نہ نکلی آہ سینے سے نہ پلکوں پر نمی آئی
مگر پھر بھی ہوا ناگاہ مجھ سے سامنا تیرا
وہ نظروں کو گرا لینا وہ آنچل تھامنا تیرا
وہ دھڑکن میں تلاطم سا نظر میں تھر تھراہٹ سی
کہیں پوشیدہ خود سر سرسراتی کوئی چاہت سی
وہی احوال کی پرسش، وہی القاب رسمی سے
وہی رسمی تکلم سا، وہی آداب رسمی سے
نہ دل نے بات کی دل سے نہ آنکھوں نے کی آنکھوں سے
نہ کچھ سمجھا نہ سمجھایا نہ نکلی بات باتوں سے
ہے دریا کی روانی میں نہ ندیا کے چلن میں ہے
یہ لہروں کی فراوانی جو تیرے پیرہن میں ہے
تری تصویر آویزاں اے جاں جو میرے من میں ہے
ادا کیسے زباں سے ہو نہاں جو میرے من میں ہے
ہے گل میں نہ گلستاں میں جو خوبی گلبدن میں ہے
کہاں سرو و سمن میں وہ جو تیرے بانکپن میں ہے
اثر انگیزی سیرت میں، بلا خیزی حسن میں ہے
کہ خوش رنگ و معطّر گل کوئی جیسے چمن میں ہے
یہ گستاخی عجب سی ہے بھلا کیسی یہ جرأت ہے
بہت سی معذرت لیکن حقیقت تو حقیقت ہے
کہانی ہے یہ یک طرفہ سی بے مایہ سی چاہت کی
کہاں کس نے کسی سے کب، بھلا کیسی محبّت کی
مرے اپنے مسائل ہیں مری مجبوریاں اپنی
تمھاری قربتیں اپنی تمھاری دوریاں اپنی
یہ ممنوعہ شجر جنت میں نا ہوتا تو اچھا تھا
محبت میں نہ تیرا سامنا ہوتا تو اچھا تھا
بہتر ہے ابھی صدمہ دلِ ناکام کو پہنچے
بنا آغاز افسانہ کسی انجام کو پہنچے
رہے یہ عشقِ یک طرفہ جو بے نیل و مرام اچھا
کہ اس قصے کا یونہی اور یہیں پر اختتام اچھا